Македонија повторно ќе биде домаќин на едно европско првенство во млади категории откако нашата земја беше избрана од ФИБА Европа за домаќин на шампионатот – Б дивизија за кошаркари до 16 години.
Станува збор за првенство на кое ќе учествуваат и нашите млади кошаркари, а кое ќе се одржи во периодот од 5 до 16 август, при што дополнително ќе биде одлучено дали тоа ќе биде само во Скопје или и во некој од другите градови во Македонија.
„Кошаркарската федерација на Македонија ја информира јавноста дека ФИБА Европа, денеска, донесе одлука Европското првенство во „Б“ Дивизија, во категорија У16-мажи, да ѝ го додели на организација на Македонската кошаркарска федерација.
Како федерација, со големо задоволство и целосна одговорност, ја прифаќаме оваа одлука на ФИБА Европа, која претставува уште една потврда за довербата во нашите организациски капацитети и искуство во реализација на меѓународни натпреварувања. Убедени сме дека нашите млади кошаркари ќе ја претставуваат државата на достоен начин и ќе дадат максимум на ова значајно меѓународно натпреварување, кое воедно ќе биде и голем празник за македонската кошарка.
Кошаркарската федерација на Македонија навремено ќе ја информира јавноста за сите дополнителни детали поврзани со организацијата и одржувањето на првенството“, објавија од македонската куќа на кошарката.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
