Во очекување на најголемиот настан за македонскиот фудбал во историјата, првото учество на најдобрата национална репрезентација на Европско првенство, ЕКИПА издвојувајќи ги најзначајните фудбалери, личности и настани од нашата фудбалска историја, се до 11. јуни преку серијал-текстови како најава за тоа што ги очекува Горан Пандев и соиграчите на УЕФА Евро 2020!
Низ неколку текстови наредниот период, најпрво, ги издвојуваме сите македонски фудбалери кои биле дел од ТОП 5 најдобрите европски лиги. За старт, од денеска, на точно 100 дена пред ЕП – Македонците кои ја почувствувале Серија А во Италија!
============================================================================================================================
Македонија во својата историја, почнувајќи од 1928 година, има вкупно 44 фудбалери кои ја почувствувале моќта на ТОП 5 најсилните лиги во светот (Италија, Англија, Шпанија, Франција и Германија). Од нив девет Македонци изминативе 70 години одиграле барем една минутa во најсилната италијанска лига – Серија А, од Спасоје Николиќ па се до Елиф Елмас.
Спасоје Николиќ (1922 – 1978) од Битола е првиот македонски фудбалер кој играл во Серија А. Во сезоната 1949/50 настапуваше за Венеција во најсилната италијанска лига одбележувајќи 18 настапи, притоа со еден постигнат гол. Во сезоната 1950/ 51 исто така играше за Венеција, но во Серија Б. Николиќ претходно играл и за ФЦ Париз во Лига 1 во Франција, а кариерата ја завршува во Рен од 1951 до 1953 повторно во најсилната француска лига.
Најуспешниот Македонец кој е, без сомнение, и икона на Серија А е секако Горан Пандев. „Гранде Пандев“ досега има 463 настапи во Серија А, за Анкона, Лацио, Интер, Наполи и Џенова, со досега 97 постигнати голови, а во очекување и на толку посакуваната стотка!
Покрај Николиќ и Пандев, дел од Серија А во историјата биле и Дарко Панчев, Илија Несторовски, Александар Трајковски, Агим Ибраими, Стефан Ристовски и Горан Славковски, па се до последниот кој се пресели на Апенините, Елиф Елмас во дресот на Наполи. Дури пет фудбалери од вкупно 9 Македонци кои настапувале во Серија А во историјата, се актуелни репрезентативци кои ќе настапат и на престојното Европско првенство.
Најмалку, само еден настап, има Горан Славковски во дресот на Интер. Момчето кое беше најавувано како огромна ѕвезда на европскиот фудбал, и кој беше повикан за настап и во македонскиот репрезентативен дрес, ниту најмалку не ги исполни предвидувањата на фудбалската јавност, неславно прерано завршувајќи ја фудбалската кариера.
СИТЕ МАКЕДОНСКИ ФУДБАЛЕРИ ВО ИСТОРИЈАТА КОИ ЈА ПОЧУВСТВУВАЛЕ СЕРИЈА А
1. Горан Пандев (2003-14; 2015-) – (Анкона, Лацио, Интер, Наполи, Џенова)
Настапи: 463, Голови: 97
2. Илија Несторовски (сезона 2016-2017; 2019-) – (Палермо, Удинезе)
Настапи: 80, Голови: 16
3. Елиф Елмас (2019-) – (Наполи)
Настапи: 46, Голови: 3
4. Aлександар Трајковски (2015-17) – (Палермо)
Настапи: 43, Голови: 4
5. Дарко Панчев (1992-1993; 1994-95) – (Интер)
Настапи: 19, Голови: 3
6. Агим Ибраими (2013-14) – (Каљари)
Настапи: 25, Голови: 2
7. Спасоје Николиќ (1949-1950) – (Венеција)
Настапи: 18, Голови: 1
8. Стефан Ристовски (2014-15) – (Парма)
Настапи: 6, голови: /
9. Горан Славковски (2005-06) – (Интер)
Настапи: 1, Голови: /
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
