ЕКИПА во Љубљана,
Катерина Павлова Николовска, Никола Ѓуровски
Македонија имаше ден одмор за да собере сила за завршните два меча од групата, а Белорусите зедоа дополнителен залет со синоќешниот супер-пресврт против Финска и триумф кој им дава надеж за осминафиналето. Вечерашната пресметка (20.30 часот) и за двете селекции е извонредно значајна, за избраниците на Никола Матијашевиќ можеби и последна шанса да се израдуваат на победа на ЕП 2019, а за Белорусија секако врата која мора да ја отворат за влез меѓу 16-те најдобри на шампионатот.
Капитенот Никола Ѓоргиев и понатаму оптимист, не се откажува до последен момент и секако е првиот што треба да ја мотивира селекцијата за преостанатите два меча. Тој вели дека е Белорусија и не е непобедлива.
„Во некои периоди на ова Европско првенство одигравме на ниво кое што е доволно за да славиме против Белорусија. Посакувам да ја повториме таа квалитетна игра и убеден сум дека ако го направиме тоа, можеме да победиме“, изјави капитенот Никола Ѓоргиев.
Белорусија си има свои планови. Со триумф над Македонија го трасира патот кон осминафиналето. Дуелот е закажан за 20.30 часот во „Стожице“.
Ова ќе биде прв меѓусебен натпревар меѓу Македонија и Белорусија. Противникот е третпат на Европско првенство, а синоќа ја оствари првата историска победа во деветтиот натпревар.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА