Македонската кикбокс репрезентација предводена од претседателот Дејан Митровски – Урко престојниов викенд ќе учествува на Европскиот кикбокс куп во Пловдив., Бугарија.
Претседателот Митровски вели дека Европските и светските купови, кои се на ниво на официјалните европски и светски првенства, се исклучително важни за рејтингот на националниот тим и македонските репрезентативци за квалификации, но и како вистинска контрола за подготвеноста на натпреварувачите.
„На европските купови македонските кикбоксери имаат можност да се сретнат во рингот со светски и европски шампиони на кои, пак, се соочуваат и на официјалните европски и светски првенства. Овие купови се идеална можност и за нас тренерите да ги согледаме аномалиите на противничките борци и градиме техника и тактика соодветна за совладување на конкурентните борци од другите земји“ – ни изјави претседателот Дејан Митровски – Урко.
Според најавите, на Европскиот куп во Пловдив ќе учествуваат 1379 натпреварувачи од 212 клубови од 29 земји.
Македонија, ќе биде предводена од тренерите Дејан Митровски – Урко, Драган Атанасовски, Александар Димовски, Зоран Спасов, Дарко Гоцевски, Ненад Манојловски, Тони Бошевски и Јован Крстевски, а ќе ја претставуваат вкупно 28 боксери од осум домашни клуба:
1. КБК ШАМПИОН – Скопје со пет натпреварувачи
2. КБК ТИМ ЗОРАН – Струмица со пет натпреварувачи
3. КБК ЕНЕРЏИ – Битола со пет натпреварувачи
4. КБК ГЛАДИЈАТОР – Скопје со тројца натпреварувачи
5. КБК ЛИДЕР – Виница со двајца натпреварувачи
6. КБК РАБОТНИЧКИ АДОРА – Скопје со двајца натпреварувачи
7. КБК САМУРАЈ – Битола со двајца натпреварувачи
8. КБК ПРЕДАТОР – Куманово со еден натпреварувач
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
