Новак Ѓоковиќ има трофеи од буквално сите позначајни турнири во светот на тенисот, но Србинот не крие дека она што му недостига е олиписко злато. Токму затоа, настапот во Париз беше приоритет за ветеранот од самиот старт на годинава, а фактот дека Ѓоковиќ е без трофеј во 2024 е само мотив плус до него да дојде токму на Олимписките Игри.
За Новак ова е петто учество на ОИ и досега има само еден медал, бронзен од Пекинг, а триумфот над Мусети значеше и прво олимписко финале во кариерата на Ѓоковиќ. Тој јасно стави до знаење дека не планира да застане тука.
„Тешко е да се сумираат емоциите, петти Олимписки игри, а за првпат ми успеа да го минам полуфиналето. Нема да застанам, секако дека не се задоволувам само со пласман, одам по злато. Медалот е обезбеден, треба да прославам, се надевам дека ги израдував навивачите во Србија и дека ќе прикажам добра игра во финалето“, порача Ѓоковиќ веднаш по труимфот над Мусети.
Предизвикот во денешното финале (14 часот) е огромен ако се знае дека против себе ќе го има Карлос Алкараз. Младиот Шпанец исто како и Ѓоковиќ игра одлично на олимпискиот турнир, а самодовербата кај Алкараз ќе биде уште поголема ако се знае дека пред само 21 ден играше големо финале против Ѓоковиќ на Вимблдон и премногу лесно и убедливо го зеде скалпот на Србинот.
„Финалињата се играат за да се победат, да се крене пехарот, тоа е моето мото и тоа се однесува и на овој дуел со Ѓоковиќ“, порача Карлос Алкараз.
Ако успее да слави денеска, Алкараз ќе стане само втор тенисер во историјата што во иста календарска година славел на Ролан Гарос, а потоа и на Олимпискиот турнир. Ова претходно му има успеано само на Рафаел Надал во 2008 година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
