Младата репрезентација на Македонија за фудбалери до 21 година денеска со собирот во хотел Парк го означи почетокот на подготовките за претстојните контролни натпревари против Ерменија и Малта во Скопје.
Избраниците на Драган Канатларовски попладнево, пак, на терените на ФФМ го одработија и првиот тренинг во пресрет на двете контролни пресметки, низ максимално позитивна атмосфера со верба за позитивни јунски резултати.
„Од натпревар во натпревар играме се подобро, растеме и созреваме заедно како тим. Владее одлична атмосфера во репрезентацијата, се надевам дека до почетокот на квалификациите ќе бидеме во одлична форма и ќе се прикажеме во добро светло. Имаме серија на одлични резултати позади нас. Одигравме одличен турнир во Анталија, иако загубивме два пати незаслужено, особено во дуелот за освојување на првото место против Словачка, каде што бевме подобар противник во текот на сите 90 минути“ – вели еден од најдобрите репрезентативци, Методи Максимов, притоа дополнувајќи:
„Имаме одличен тим, поседуваме голем квалитет и функционираме добро како колектив. Нормално е дека има простор за напредок, се стремиме од натпревар во натпревар да бидеме се подобри и поконкурентни. Сакаме да ги изненадиме противници со нашата добра и борбена игра. Треба да веруваме максимално во нас и во нашите можности. Сите како едно треба да продолжиме да се бориме и да даваме се од себе за дресот со државен грб. Сакаме да оствариме две победи против Ерменија и Малта и на одличен начин да ги заокружиме овие подготовки и серијата на контролни мечеви. Моментално се чувствувам одлично на физички план, со мојот клуб Шкендија веќе две и пол недели интезнивно тренираме. Подготвен сум за претстојните предизвици што ме очекуваат со репрезентацијата на Македонија“.
Репрезентацијата на Македонија до 21 година, на 8. септември против Шведска ги започнува квалификациите за пласман на ЕП 2025.
Младата репрезентација на Македонија на 15. јуни, со почеток во 17 часот ќе ја одигра првата контролна средба против соодветната селекција на Ерменија. Пет дена подоцна е вториот контролен дуел, во истото време (17 асот) против репрезентацијата на Малта. Двата натпревари ќе бидат одиграни на тренинг центарот „Петар Милошевски”, во Скопје.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
