Фудбалската репрезентација на Македонија в четврток ќе ја пречека Грузија на домашен терен во натпревар од 3. коло од Ц групата во новата сезона од натпреварувањето на УЕФА, Лигата на нации.
По првите два натпревари против Бугарија и Гибралтар, „црвено-жолтите“ собраа четири бода. Напаѓачот на македонскиот тим Милан Ристовски вели дека очекува тежок натпревар, но верува во победа.
„Го покажавме нашиот квалитет на првите два натпревари. Сметам дека можеме многу повеќе и тоа ќе го покажаме на следниот меч против Грузија. Двете победи се од големо значење за самодовербата на Грузија. Очекувам тежок натпревар бидејќи тие ќе дојдат мотивирани да се борат против нас. Меѓутоа ние веруваме во нас и во замислата на селекторот. Ќе покажеме желба и борба. Ние гледаме напред од меч во меч. Направивме кратка анализа и знаеме што не очекува. Треба да се концентрираме на нашата игра и на нашата офанзива и се надевам дека ќе успееме во четврток. Мора да веруваме во нас и во нашето заедништво и тимски дух“, изјави Ристовски.
Натпреварот меѓу Македонија и Грузија кој ќе се игра на националната арена „Тодор Проески“ во Скопје е закажан за во четврток со почеток во 20.45 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
