Македонските одбојкари се фокусираат на наредниот натпревар против Црна Гора (сабота 20 часот, СЦ „Борис Трајковски“) на кој победа ќе значи и речиси сигурен пласман во осминафиналето од овој европски шампионат.
Владо Милев, кој е еден од најискусните во нашиот табор, верува во успех против Црногорците, но и посакува одлична атмосфера на трибините како што тоа беше случај на првиот меч со Данска.
„Имавме време да одмориме и добро да се подготвиме за Црногорците. Тоа е уште еден квалитетен противник, по квалитетот се на наше ниво, а се нешто поискусни во однос на данската репрезентација. Најважно сепак ќе биде како ние ќе одиграме и верувам дека со помош на публиката ќе стигнеме до победата. Поддршката против Данска ни беше драгоцена и сакам да упатам апел навивачите да продолжат да не бодрат бидејќи тоа е многу важно за нас во обидите да ги оствариме зацртаните цели“, изјави Владо Милев.
Тој се осврна и на дуелот со Данците, на кој Македонија успеа да се врати од сет негатива и да триумфира со 3-1.
„Знаевме дека Данците можат да бидат опасни со сервис, против нас во клучните моменти правеа грешки и тоа го искористивме. Беше тежок меч, но кога беше најважно покажавме карактер, имавме повеќе настапи од нив на европските првенства и тоа искуство беше драгоцено кога се кршеше резултатот“, истакна Милев.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
