ЕКИПА во Рига, Летонија
Владимир Булатовиќ
Селекторот на македонската репрезентација, Боби Милевски верува дека неговите избраници ќе одиграат уште еден квалитетен натпревар за бодови во Групата 4 од Ц-Лигата на нациите на утрешниот натпревар против Летонија во Рига.
Неопходен е пристап на дуелот како што беше тоа против Ерменија за да се дојде до посакуваната цел…
„Како и секој противник и Летонија максимално ја почитуваме затоа што ако немате респект кон противникот не можете да го дадете најдоброто во насока на сопствената презентација на терен. Но, нашиот фокус единствено е како ние ќе изгледаме и функционираме, и ништо друхо. И претходно кажав дека само ние ќе се прашуваме низ овие квалификации за првото место во групата. Македонија која јас ја замислувам секогаш ќе оди на победа, така било и така ќе биде. Овие момци ја заслужуваат сета наша почит затоа што, без разлика каква е нивната ситуација во клубовите, секогаш даваат повеќе од максимум кога е во прашање националниот тим“ – истакна селекторот Милевски на прес-конференцијата во Рига, притоа дополнувајќи:
„Да, ние сакаме и да чувствуваме еден вид притисок на натпреварите, затоа што тоа на некој начин е и мотив за сите нас. Притисокот и очекувањата од јавноста значат дека таа очекува нешто од вас, а очекувањата значат дека досега сте покажале некаков квалитет што ги натерало да веруваат во вас. Вербата во овие момци е повеќе од значајна за успех. Јас, ќе повторам, силно верувам буквално во секој поединец тука затоа што заслужува да биде“.
Но, останува и фактот дека сериозни се проблемите околу составувањето на утрешниот тим…
„Секако ќе ни недостасуваат Чурлинов и Трајковски поради повреди, како и Зајков и Серафимов поради жолти картони, што ни задава проблеми околу креирање на составот. Но, знам дека сите оние ќе се најдат утре на теренот ќе го дадат максмумот како и секогаш во репрезентативниот дрес. Тоа го покажале и докажале многупати претходно“ – вели Боби Милевски.
„Што се однесува до креацијата на тимот, верувам дека успешно ќе мине и денешниот тренинг, сите кои се тука ќе бидат здрави и подготвени за утрешниот предизвик“.
Натпреварот меѓу Летонија и Македонија во 3. коло од Групата 4 во Ц-Лигата на нациите се игра утре со почеток од 18 часот на стадионот „Сконто“ во Рига.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
