Селекторот на македонската репрезентација Благоја Милевски, денеска го објави списокот на фудбалери на кои ќе смета за последните два меча во циклусот во Лигата на Нации против Летонија и против Фарски Острови на домашен терен.
Милевски се одлучи да повика двајца дебитанти Фета и Алчевски, и да го врати во националниот тим Сефер Емини.
„Им посакувам добредојде на двајцата дебитанти кои заедно со Стојчевски и Илиевски, кој не е сега со нас, се приклучени од последната генерација на младата репрезентација до 21 година. Се надевам дека во иднина ќе се наметнат и ќе бидат важен дел од тимот кој се гради“, рече Милевски.
Предводникот на националниот тим истакна дека проблемите со составот продолжуваат, со оглед дека Костадинов ќе го нема, а неизвесни за настап се Муслиу и Трапановски.
„Имаме проблеми со повредени играчи и нема да сметаме на Тихо Костадинов, а под знак прашалник се Муслиу и Трапановски иако се на списокот. Се надевам дека во следните денови ќе бидат сите останати здрави и способни да се стават во функција на тимот. Сите сме свесни за важноста на овие два меча и главна цел ни е да останеме на првата позиција. Сето останато што ќе ни донесат овие мечеви ќе биде само плус од тоа што беше зацрнато на почетокот на Лигата на Нации“, рече Милевски.
Тој кажа дека секој бод и секој гол е важен и дека победата е императив и на двата меча.
„Во секое мое обраќање пред фудбалерите напоменувам дека во ова издание секој бод и секој гол е важен. Секој меч го почнуваме со цел да победиме и да ги смалиме грешките кои што се неизоставен дел од секој натпревар. Победа е императив на мечот со Летонија иако очекувам многу потежок меч од тој во Рига. Секој меч е за себе и мора да бидете на својот максимум на секој натпревар за да се надевате на позитивен исход“, вели Милевски и додава:
„Никако не можеме да се потпираме на некоја форма на одредени репрезентативци. Факт е дека поминавме многу тежок период со минутажата на нашите играчи во клубовиге. Се надевам дека ќе одиме во нагорна линија. Сепак кога настапуваат за Македонија сето тоа е неважно и е настрана бидејќи тука се нови предизвици кои момците ги исполнуваат и даваат и повеќе од максимум. Секогаш кога играат во дресот на Македонија момците не штедат ни срце, ни енергија. Тоа го покажале многупати досега и знам дека така ќе биде и сега“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
