Легендарниот српски кошаркар Милош Теодосиќ стави крај на својата играчка кариера. Таа одлука искусниот плејмејкер ја соопшти преку соопштение до медиумите.
„Почитувани пријатели, почитувани фанови и познавачи на кошарката,
Најпрвин ви благодарам за 30 години заедничка борба, уживање, радост и тага. Дојде време да се збогувам со една фаза од мојата љубов кон магичната игра на обрачите.
Зад мене, зад нас е многу желба, борба, одрекување. Освоени трофеи, но и изгубени финалиња. И не би менувал ништо“, напиша Теодосиќ.
Милош Тедосиќ ја заврши играчката кариера на 38 години, а последната сезона ја играше во Црвена Звезда. Со кошарка почнал да се занимава во родното Ваљево, а негов прв сениорски клуб бил ФМП.
Тој го носеше и дресот на Олимпијакос, ЦСКА Москва, Лос Анџелес Клиперс и Виртус Болоња. Со ЦСКА ја освои титулата во Евролигата во 2016 година, а во 2010 година беше прогласен за МВП на ова натпреварување.
Беше избран и во тимот на деценијата на Евролигата (2010-2020), трипати беше избран во најдобриот тим на натпреварувањето. Го освои и Еврокупот, а беше и МВП и најдобар стрелец.
Со репрезентацијата на Србија има три сребрени медали од Европското првенство во 2009 година, СП во 2014 година и Олимписките игри во 2016 година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
