Македонија стигна до втората победа на Европското Првенство за кошаркари до 16 години, откако нашите надежи попладнево триумфираа над соодветната селекција над БиХ со убедливи 76-64. Поразот од Русија експресно беше оставен зад „црвено-жолтите“, кои денеска прикажаа одлична игра и заслужено стигнаа до победата со која ја остварија примарната зацртана цел – опстанок во елитното друштво во оваа возрасна категорија.
Избраниците на селекторот Дервишевиќ беа подобри во голем дел од првата четвртина, не искористија неколку напади при водство од 19-13, па противникот со фуриозен финиш го доби овој дел од мечот со минимални 19-20. Босанците парираа само уште во втората четвртина, на одмор заминаа со минимално водство од 33-34, за потоа Македонија целосно да ја преземе контролата. Третата четвртина мина во тотална доминација на нашите кошаркари, кои ги добија овие 10 минути со убедливи 30-14. Лекцијата од поразот во второто коло од Израел беше научена, па „црвено-жолтите“ овојпат рутински го исконтролираа резултатот до самиот крај, триумфирајќи со конечни 76-64.
Андреј Митревски одигра уште еден одличен натпревар и со 25 поени беше прв стрелец во македонскиот состав, Мемед реализираше 15, а Наков го заврши мечот со 10 поени и 8 скокови.
Следен противник на Македонија во борбата за пласман од 9. до 12. место ќе биде селекцијата на Словенија, која триумфираше над Германија со резултат 72-65.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
