Македонската кошаркарска репрезентација во месец август ќе настапи на нови претквалификации за едно големо првенство, овој пат за Светското кое ќе се одржи во 2027 година.
Овие квалификации ќе означат и нов почеток за кошаркарската репрезентација на Македонија со оглед на потполно променетиот стручен штаб и подмладувањето во играчкиот кадар.
„Повикани се неколку млади играчи. Имаме доста млади играчи во овој состав, и затоа треба да се подготвиме што е можно најдобро. Имаме некои петнаесетина дена, можеби и нешто повеќе, до натпреварите од претквалификацискиот циклус. Оттука најдобро е да се подготвиме што е можно подобро за тие натпревари. Исто така, да се спремиме добро и да ги одиграме и оние подготвителни натпревари, против репрезентацијата на Швајцарија. Да дадеме наш максимум, и да избориме најдобар можен резултат. И да се квалификуваме за оние наредни квалификации“, вели повратникот во репрезентацијата Андреј Митревски.
Ривали на Македонија во овој претквалификациски циклус се Романија и Унгарија, репрезентации кои ја имаат улогата на фаворит со оглед на кадарот кој ќе настапи во „црвено-жолтиот“ дрес, но како што вели Митревски фаворитската улога треба да се потврди на терен.
„Знаеме дека Романија и Унгарија се добри противници, но тоа не значи ништо за нас. Нормално е дека имаме шанси. Секако дека ќе се бориме, дека ќе одиме на победа. Можеби на ‘хартија’, тие би биле фаворити. Но секако, тоа не значи ништо, и нормално, ќе одиме на победа и на двата натпревари, и да се квалификуваме за понатамошната фаза од натпреварувањето“, додава бекот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
