По вчерашниот состанок на Здружението на прволигаши и роковите што беа побарани од МКФ за исплата на долговите, денеска со одговор се јави македонската куќа на кошарката, која постави сопствени рокови за подмирување на обврските кон неа.
МКФ и клубовите се на ист став до петок да се плати првата рата од котизацијата, рокот за подмирување на обврските за лиценци на странски играчи според МКФ треба да биде 20 април, а како можен инструмент на плаќање се наведува банкарска гаранција.
Соопштението на МКФ го пренесуваме во целост:
По барањето на Здружението на Прволигаши во врска со продолжување на рокот за плаќање на котизации, казни и лиценци за странски играчи, Македонската кошаркарска федерација го зазема следниот став:
1.Клубовите да ја исплатат првата рата од котизацијата најдоцна до 2. март (петок);
2. Клубовите да ги подмират лиценците за странски играчи најдоцна до 30. март (петок) со обезбедена банковна гаранција за наплата до 20. април (петок);
3. Клубовите да ја исплатат втората рата од котизацијата како и сите казни дотогаш изречени најдоцна до 20. април со обезбедена банковна гаранција за наплата до 20. април (петок).
Доколку Здружението на Прволигаши се согласува со одлуката на МКФ рокот за доставување на банковни гаранции е 9. март (петок). Во случај да не се прифатат и испочитуваат овие одлуки Комесарот за натпреварување ќе мора да постапи по Правилникот и Пропозициите за натпреварување односно одлуката донесена за суспензија.
Во интерес на кошарката, се надеваме дека клубовите нема да ја злоупотребат нашата попустливост и доверба во нив и нивното менаџирање и дека конечно ќе изнајдат решение за кое се задолжени со нивните функции за да сите заедно им овозможат континуитет и регуларно првенство на сите љубители на кошаркарскиот спорт.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
