Младинската кошаркарска репрезентација на Македонија ја забележа и третата победа во низа во групата А, славејќи над селекцијата на Ирска со убедливи 77-66. Со овој резултат, нашите млади кошаркари го освоија првото место во својата група со што добија нешто полесен противник во четвртфиналето од Европското првенство – Б дивизија што се одржува во Скопје, за уште еден чекор напред кон остварување на целта – влез во А дивизијата.
Денешниот дуел неочекувано почна со подобра игра на ирските кошаркари, кои го искористија малото опуштање во нашиот табор и со прецизни удари од далечина ја добија првата четвртина со 12-18. Јасно беше дека огромната разлика во квалитет е на страната на Македонија, тоа стана и повеќе од очигледно во вториот период во кој профункционира и нашиот шут од далечина, па набрзина дојде до резултатски пресврт и на одмор се замина со водство на „црвено-жолтите“ од 39-27, по тројката што ја постигна Марин Петков.
Македонија продолжи да доминира и на самиот старт од вториот период, кога по серијата грешки на противниците и лесните поени на нашите млади кошаркари предноста скокна и на 18 поени. Триумфот беше осигуран, што му овозможи на селекторот Василев да го изротира тимот и да им даде поголема минутажа на оние кои не добија премногу шанси на претходните натпревари. Нашиот состав беше на патот до убедлив триумф, имаше преубедливи 14 поени разлика (68-54), но потоа во последната четвртина дојде до сериозен пад по кој Ирците намалија на „минус седум“ на три минути докрајот (71-64). Василев мораше да побара тајмаут и да ги врати стартерите на терен, при „плус пет“ конечно серијата на противникот ја прекина Андреј Митревски, а точка на триумфот со поени и и прекршок врз него стави Хот.
Симиќ со 17 поени беше најефикасен во нашиот табор, одлична игра прикажа и Хот со дабл-дабл од 15 поени и 13 скокови, а двоцифрен ефект имаше и Филип Наков со десет постигнати поени.
Македонија својот четвртфинален дуел ќе го игра на 14. јули, петок, а за противник ќе ја има Велика Британија, која со две победи и два порази го освои второто место во групата Б, зад Португалија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
