Марк Маркез ги разочара своите фанови на трката во Остин откако со почетничка грешка остана без посакуваниот триумф, што ќе беше шести во низа за шпанскиот ас од стартот на сезоната во Мото ГП шампионатот.
Шпанецот имаше перфектни „пет од пет“ во пресрет на денешната трка, во која повторно влезе како голем фаворит и се наоѓаше во удобно водство се до деветтиот круг. Во момент на невнимание, тој при еден свиок ја загуби контролата над моторот, излетувајќи од патеката и препуштајќи му го лидерското место на Бањаја.
Маркез се обиде да продолжи, но веќе се наоѓаше на опашката од колоната, не успеа да ги мине првите ривали пред него како што се надеваше, по што повеќекратниот светски првак реши да се повлече упатувајќи се во својата гаража.
Франческо Бањаја стигна до првата победа во 2025 (вкупно 30. за него во Мото ГП шампионатот), воедно и прва за овој мотоциклист на американската трка, второто место му припадна Алекс Маркез, а третопласиран беше Фабио Ди Џанантонио.
Големиот „кикс“ го чинеше Марк Маркез и лидерско место во генералниот пласман, откако Шпанецот му го препушти врвот на својот брат Алекс. Алекс Маркез е првопласиран со 87 бода, Марк Маркез има 86, додека Бањаја е на третото место со 75 освоени бода во досегашниот дел од сезоната.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
