Министерството за внатрешни работи се огласи во вчерашниот срамен и шокантен инцидент кој се случи на финалето од ракометниот Куп на Македонија каде полициски службеник во пендрак по глава го удри ракометарот на Вардар и воедно репрезентативецот на Македонија, Филип Талески.
Во изјава за „Курир“, од МВР информираат дека во СВР Охрид не е поднесена пријава од ракометари, делегати или други официјални спортски претставници против полициски службеници, но Одделот за внатрешна контрола, криминалистички истраги и професионални стандарди оформил предмет и презема мерки за целосно расчистување на случувањата.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица.
По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот“, велат од МВР за Курир.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
