Кошаркарите на Гостивар приредија вистинска сензација откако вечерва во премиерниот меч од 17. коло во Првата лига на домашен терен славеа над актуелниот шампион МЗТ Скопје Аеродром со 60-55. Maкедонскиот шампион одигра еден катастрофален натпревар, а за тоа како изгледаа кошаркарите на МЗТ на теренот покажува тоа што во третиот период успеаја да постигнат само четири поени.
Гостите подобро го отворија натпреварот и по десет минути играа имаа позитива од 15-21. Домашниот тим заигра далеку подобро во вториот период, па на пауза меѓу двете полувремиња замина со негатива од само два поени 33-35.
Актуелниот шампион одигра катастрофална трета четвртина во која постигна само четири поени, па гостиварци иако не беа и тие напаѓачки расположени пред последните десет минути влегоа со позитива од 48-39.
Скопскиот тим со добра игра успеа да се врати во мечот и да го сведе натпреварот во неизвесна завршница откако на минута и петнаесет секунди резултатот беше израмнет 53-53. Во финишот подобро се снајдоа домаќините кои на крајот стигнаа до конечен триумф од 60-55. Дарко Соколов со 13 поени беше прво име во таборот на победникот, додека кај поразените недоволни беа 18 поени на Војдан Стојановски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
