МЗТ не знае што е зборот предавање – голем триумф над ФМП за чекор напред кон опстанокот во АБА

МЗТ Скопје стигна до значајна победа над ФМП со резултат 87-82, огромен триумф за македонскиот првак во трката за бегство од последното место на табелата во АБА-лигата. „Металците“ одиграа одличен меч, во клучните моменти од третата и од четвртата четвртина блеснаа Американците Кефи и Вер, кои се погрижија аеродромци да ја прослават четртата победа во регионалното натпреварување. МЗТ сега е израмнет по бројот на победи со претпоследниот Борац Чачак, кој има и натпревар помалку (в понеделник ќе го игра својот меч од ова коло, на домашен терен против Студентски Центар).

Македонскиот првак во грч го почна натпреварот, па повеќе од пет минути немаше постигнато поени од поле, а ФМП знаеше како да го искористи тоа и набрзина поведе со 2-14 (единствените поенина МЗТ беа дело на Миќовиќ од линијата за слободни фрлања). Кук конечно погоди за „металците“, и тоа под прекршок, по што аеродромци почнаа да ја топат предноста на противникот. Првата четвртина заврши со резултат 13-17, a МЗТ продолжи со добра игра и со тројката на Кефи успеа да стигне и до првото водство на натпреварот (25-23, 14. минута). До крајот на полувремето се играше израмнето, а ФМП благодарение на подобриот финиш на одмор замина со водство од 35-38.

МЗТ Скопје беше подобар противник во третата четвртина, во самиот крај блесна Кефи, постигнувајќи пет поени во последната минута, по што „металците“ во четвртиот период влегоа со удобно водство од 65-56. ФМП немаше намера да се предаде, МЗТ имаше неколку кризни минути во нападот, па гостите од Србија се приближија на 65-63, по нецели три минути игра во четвртата четвртина. Николиќ побара тајмаут, МЗТ ја врати сигурноста во нападот, па Вер постигна фантастична тројка од девет метри за 75-70, веднаш потоа и Бурсаќ погоди од контранапад за 77-70 за македонскиот шампион. Бурсаќ со нова тројка стави крај на сите надежи на гостите за камбек, за конечен триумф од 87-82.

Мајк Кефи со 26 поени беше најефикасен во таборот на МЗТ Скопје, 13 постигна Вер, а 10 Бојан Крстевски реализираше 10 поени.

МЗТ Скопје во следното коло ќе гостува во Србија на тимот на Мега, меч што е закажан за недела, точно на пладне.