МЗТ Скопје е последниот полуфиналист во Купот на Македонија откако славеше во четвртфиналето против Кожув со 83-72 (23-11,24-27,17-17,19-17).
„Металците“ максимално рутински обезбедија место меѓу четирите најдобри на турнирот во Кавадарци, најавувајќи ја победата против гевгеличани уште во првиот период кој го добија со 12 поени разлика.
Во продолжението кошаркарите на Кожув се обидоа да се доведат во позиција за изненадување, но актуелниот шампион на Македонија постојано ја контролираше и играта и резултатот за конечен триумф од 83-72.
Најдобри поединци во редовите на МЗТ Скопје беа Дреновац и Скот со по 24 постигнати поени. Скот имаше и девет скока. Двоцифрен ефект имаше уште само Лалиќ со 11 постигнати поени. Во поразениот состав се издвоија МекНил со 18 поени и Мијовиќ со 17 постигнати поени и 11 скока.
МЗТ Скопје во полуфиналето од Купот на Македонија го очекува пресметката со домаќинот на турнирот, екипата на Фени Индустри. Во второто полуфинале ќе се соочат Карпош Соколи и Работнички.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
