МЗТ Скопје одбраната на трофејот ја започна со победа, славејќи на гостувањето кај еден од најголемите ривали во сезоната ТФТ со 60-74. Избраниците на Петровиќ беа подобриот противник во поголемиот дел од мечот, навремено ги консолидираа своите редови по падот во втората четвртина, одиграа речиси перфектно во третата и сосема заслужено се радуваа на победа.
МЗТ Скопје го диктираше темпото на натпреварот уште од самото отварање. Добрата одбрана не дозволи лесни поени на ТФТ, а аеродромци беа и расположени во реализцијата за три поени во нападот па по 10. минути игра поведоа со 14-19. Домашниот состав успеа да одговори во втората четвртина, користејќи го неколкуминутниот „пост“ на гостите во нападот за превземање на предност (28-25), но браќата Стојановски не дозволија ТФТ да направи и позначајна предност. Напротив одговорија во нападот со осум поени во низа за ново водство кое овој пат беше задржано до полувремето (31-39).
Отварањето на второто полувреме беше и клучно за натпреварот. Аеродромци одиграа одлично во одбраната каде го примораа противникот на тешки обиди, а промашувањата на ТФТ знаеја како да ги искористат на спротивната страна. МЗТ Скопје ја доби третата четвртина со 20-10, со што стигна до предност од 41-59 пред последните десет минути кои беа само формалност.
По 12 поени за ТФТ постигнаа Ташовски, Стојановски и Андерсон, на кои бековите додадоа 5 асистенци, односно 4 скоока, додека крилниот играч забележа 7 скока. Со по 13 поени лидери на МЗТ Скопје беа Кефи и Крстевски на кои Американецот додаде 6 асистенции, а Македонецот 5 скока.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
