МЗТ Скопје убедливо го стартуваше плејофот во кошаркарскиот шампионат на Македонија откако актуелниот првак рутиснки славеше во првиот меч од четвртфиналната серија со Гостивар со резултат 87-68. Очекувано, „металците“ како први носители во плејофот не видоа мака против гостиварци, од самиот старт наметнаа темпо што гостите не можеа да го следат и стигнаа до убедлив триумф.
Победникот беше решен уште во првата четвртина, откако МЗТ тргна фуриозно од самиот старт поведувајќи со 11-0 по нецели пет минути, завршувајќи го овој дел од мечот со 25-10. Гостивар парираше подобро во втората четвртина што аеродромци ја добија со минимални 24-22, за МЗТ Скопје да продолжи со одличното издание и во третиот период, влегувајќи во последните 10 минути со водство од 73-50. Удобното водство овозможи шанса да добијат и дел од резервните кошаркари на „металците“, но тоа не се одрази врз конечниот резултат, МЗТ лесно ја контролираше убедливата предност и на крајот триумфираше со „плус 19“.
Танасковиќ беше најефикасен во победничкиот состав со 21 постигнат поен, Баковиќ оствари дабл-дабл од 14 поени и девет скокови, додека Војдан Стојановски имаше девет поени, седум скокови и седум асистенции. Најдобри поединци во таборот на Гостивар беа Слејтер со 22 и Вилијамс со 12 поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
