Македонскиот кошаркарски вицепрвак МЗТ Скопје Аеродром со пораз ја заврши 2018 година во АБА 2. Тимот на Ѓорѓи Кочов загуби од Борац во Чачак со 79-74. Во еден неизвесен натпревар, кошаркарите на составот од „Јане Сандански“ не успеаја да се наметнат и да стигнат до триумф. Ќе ја заокружат годината со девет победи и четири порази во ова регионално натпреварување, рангирани на втората позиција на табелата.
Воведниот период му припадна на домашниот тим кој го доби со 23-19, но МЗТ Скопје Аеродром возврати во втората четвртина и на одмор замина со два поени позитива (40-42).
Сепак, после паузата кошаркарите на Борац Чачак заиграа многу подобро, решавачки беше третиот сегмент кој домаќинот го заокружи со 24-19 и направи пресврт, што потоа го претвори и во заслужен триумф.
Најефикасен кошаркар во редовите на МЗТ беше Иве Иванов со 25 поени, а Андрија Бојиќ постигна три поени помалку. Во победничкиот тим на Борац Чачак, Радован Ѓоковиќ уфрли 21 поен.
Следниот меч од АБА 2 лигата, МЗТ Скопје ќе го одигра на 3 јануари во Скопје против лидерот, Приморска.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
