Кошаркарите на МЗТ Скопје забележаа нова победа во Првата македонска кошаркарска лига, овој пат во повеќе од интересна пресметка со екипата на Маџари, на крај триумфирајќи на гостувањето со 76-87.
„Металците“ ја продолжуваат битката за врвот на табелата со ТФТ Скопје, откако дојдоа до значајна победа на тешкото гостување против повеќе од цврстата екипа на Маџари која уште еднаш покажа зошто е најголемото изненадување во сезоната во елитното друштво, уште во првата година од изборениот прволигашки статус.
Избраниците на Мишо Тодоровиќ одлично го почнаа мечот максимално контролирајќи ја играта и резултатот во првата четвртија која ја добија во своја корист со 24-22. Но, одлично одиграна втора четвртина на МЗТ Скопје која, се чини, го одлучи победникот на мечот. МЗТ го доби вториот период од играта со 11-25, заминувајќи на паузата со предност од 35-47.
Во третата четвртина, Маџари повторно се врати во игра, доаѓајќи во еден момент и на минус пет (54-59), за да МЗТ, сепак, влезе во последната четвртина со предност од 57-64.
Последниот период од играта повторно целосно им припадна на гостите, кои на крајот дојдоа до конечната победа од 76-87.
Најдобар во победничкиот тим беше Петков со 26 поени, шест скока и пет асистенции, а Мекејден заврши со 13 поени. Танасковиќ имаше 11 поени и 9 скока, а со 10 постигнати поени мечот го заврши Војдан Стојановски.
Кај Маџари, пет кошаркари завршија со двоцифрен број поени. Хот беше најдобар со „дабл-дабл“ од 15 поени и 14 скока, Грин запиша 14 поени, Армстронг имаше 13 поени, а по 12 поени постигнаа Левис и Стејплтон.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
