Рафаел Надал мораше да мине два дена на терените на Ролан Гарос за да обезбеди место во второто коло од овој гранслем турнир, триумфирајќи со максимални 3-0 во сетови против Италијанецот Болели. Првиот носител вчера имаше водство од 2-0 во сетови, но при предност на Болели од 0-3 во третиот сет во Париз почна да паѓа пороен дожд, по што мечот мораше да продолжи дури денеска. Шпанецот експресно по продолжението израмни на 3-3, потоа Болели не искористи пет брејк-топки при 3-4, за на крајот сетот да се решава со тајбрејк. Италијанскиот тенисер беше на прагот до освојување на сет, но не искористи четири сет топки и на крајот Надал славеше со 11-9.
Следен ривал на главниот фаворит за титулата ќе биде Аргентинецот Пелја, кој денеска славеше со 3-0 на дуелот со Соуса од Португалија.
Џон Иснер го доби американскиот дуел со Рубин со 3-0 во сетови, а пласман во следната рунда обезбедија и Чилиќ, Андерсон и Куевас.
На женскиот дел од турнирот, Мертенс славеше над Лепченко со 2-1 во сетови, Стосур беше подобра од Викмајер, додека Мугуруза ја доби пресметката со Кузнецова со 7-6, 6-2.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
