Можеби петти трофеј, а можеби и збогување со тенисот. Во тој опсег би можел да биде и одговорот на Рафаел Надал до тренерот Давид Ферер за учеството на завршниот турнир во Дејвис купот во Малага за два месеци.
„Веќе разговарав со Рафа, но ништо не е договорено. Постои можност тој да биде во тимот. Неговата цел оваа година беа Олимписките игри, оттогаш не играше. Му треба одмор и време со семејството, па сега не е време за јавување. Ќе разговарам со него подоцна. Најважно е дека треба да биде добро. Ако биде добро во ноември, сигурно ќе биде меѓу играчите на кои ќе сметам“, изјави Ферер.
Шпанија минатата недела ја предводеше Карлос Алкараз, а во тимот беа уште Педро Мартинез, Пабло Карено Буста, Роберто Баутиста Агут и Марсел Гранолерс. Јасно е дека има место за Надал, се разбира, под услов да може да игра, особено што неговото доаѓање би ја распродало салата за неколку минути, дури и ако настапи само во игра на двојки. Надал нема играно во Дејвис купот од 2019 година, кога ја освои титулата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
