Меѓународниот одбор на ФИФА соопшти дека ќе го разгледа изненадувачкиот предлог на јужноамериканскиот фудбал за проширување на Светското првенство на 64 репрезентации во 2030 година.
„Предлогот да се анализира Светското првенство со 64 тима за прослава на стогодишнината во 2030 година беше спонтано изнесен од член на Советот на ФИФА под точката „било која друга работа“ на дневниот ред кон крајот на состанокот на Советот на ФИФА. Идејата беше прифатена бидејќи ФИФА има обврска да го анализира секој предлог од еден од нејзините членови или членови на Советот“ – се вели во соопштението на светската федерација.
Идејата ја предложил уругвајскиот делегат Игнасио Алонсо. Уругвај беше првиот домаќин на Светското првенство и победник на натпреварувањето во 1930 година, а треба да биде домаќин на еден натпревар во 2030 година.
ФИФА веќе го зголеми бројот на учесници од 32 на 48 за следното Светско првенство во 2026 година во САД, Мексико и Канада.
Светското првенство во 2030 година ќе има по еден воведен натпревар во Уругвај, Аргентина и Парагвај, пред натпреварувањето да се пресели кај главните домаќини Шпанија, Португалија и Мароко.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
