Илија Несторовски повторно доби шанса во стартниот тим на Удинезе и македонскиот ас успеа да се запише меѓу стрелците, носејќи водство од 0-2 на својот тим на гостувањето против Салернитана.
Сепак, и тоа беше недоволно за Удинезе да стигне до триумф бидејќи Салернитана успеа да постигне три гола и да направи целосен пресврт, оставајќи ги Несторовски и соиграчите разочарани по последниот судиски свиреж.
„Мило ми е за постигнатиот гол, но жалам што загубивме натпревар што требаше да го добиеме. Овој натпревар дефинитивно не се одвиваше како што сакавме, почнавме одлично, а потоа, по еден пад на концентрација во 42. минута се се промени. Многу сме разочарани, оваа средба потсети на многу други сезонава, на кои игравме добро, но не стигнавме до резултат каков што заслуживме. Не можам да кажам дека ова е лоша сезона, но со она што го прикажавме дефинитивно заслуживме да имаме повеќе бодови“, изјави Несторовски.
Македонецот ги минува последните денови во тимот од Удине, со оглед на фактот дека тој летово ќе си замине од таборот на Удинезе, откако пристигна во овој клуб како слободен играч од Палермо во 2019 година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
