Кошаркарските прволигаши отворија нов фронт со раководството на Македонската Кошаркарска Федерација, преку соопштение порачувајќи дека немаат намера да бидат дел од натпреварувањата под капата на МКФ (Првата лига и Купот на Македонија) доколку не биде задоволено нивното примарно барање – цените на лиценци за странци да останат исти – 250 евра кои се плаќаат кон ФИБА и ниту денар кон матичната федерација.
Ова е клучната порака пратена преку соопштението на Здружението на прволигаши, откако ова тело попладнево едвај собра кворум, за неколку часа потоа да испрати цврста и едногласна порака.
Во него меѓу другото се наведува дека дури и клубовите кои не се суспендирани (шест од вкупно десетте прволигаши) цврсто го поддржуваат овој став и нема да играат на претстојните натпревари од Купот на Македонија (закажани за 1 февруари), а потоа и во следното коло од Првата лига.
Ваквиот развој на настаните е навраќање на стариот проблем и војната што клубовите ја имаа со претседателот Петар Наумоски. Тогаш по долги разговори, караници и негодувања тие го прифатија новиот тарифник, за возврат добивајќи закажување на Вонредно Собрание. Откако смената на претседателот што повеќето прволигаши ја посакуваа не се случи, Наумоски побара почитување на договореното и наплата на парите за лиценци за странци.
Шест од прволигашите ги исполнија договорените обврски, а незадоволството на четирите кои не платија и се суспендирани сега се користи за бран од ново незадоволство од работата на актуелното претседателство.
Во соопштението се наведува и подготвеност за нов состанок со Петар Наумоски, но тешко е да се поверува дека нешто конкретно може да се смени меѓу двете страни со дијаметрално спротивни ставови – првиот човек на МКФ цврсто решен дека токму зголемените цени на лиценци за странци се вистинскиот начин да се посвети поголемо внимание на домашните играчи, и клубовите кои не ги прифаќаат неговите аргументи барајќи да останат цените кои важеа до минатата сезона.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
