Рубен Аморим во последните десетина дена беше интензивно поврзуван со Ливерпул, актуелниот тренер на Спортинг Лисабон потоа долета во Лондон на преговори со Вест Хем, а откако и двете опции пропаднаа португалскиот стратег сега е поврзуван со трет англиски премиерлигаш.
Челси е клубот што сака да го види Аморим како предводник на својот проект од наредната сезона, откако американските газди се повеќе се сомневаат во Маурицио Покетино и способноста на Аргентинецот да го извлече максимумот од овој проект во кој беа инвестирани над една милијарда фунти во нови фудбалери. Последното фијаско и поразот од 5-0 од Арсенал особено тешко им паднал на Тод Боели и останатите клупски директори, кои досега му даваа поддршка на Покетино, но никој во клубот веќе не е сигурен дека овој стратег треба да остане по завршувањето на сезонава.
Аморим е на добар пат да освои нова титула во португалскиот шампионат иако има помал буџет и од Бенфика и од Порто. Офанзивниот фудбал на кој инсистира Аморим е една од препораките, заедно со фактот дека станува збор за тренер кој знае да усовршува млади фудбалери, нешто што Челси го има во изобилство. Потежок дека од задачата е да се убеди овој стручњак да напушти победнички проект како Спортинг за да дојде во клуб што премногу често ги менуваше тренерите во последните две години.
Боели е убеден дека со богата финансиска понуда може да го привлече Аморим, па останува да се види како ќе течат преговорите меѓу двете страни и дали овој врвен перспективен стратег летово ќе се пресели на „Стемфорд бриџ“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
