Македонскиот репрезентативец Елиф Елмас одигра 60 минути како стартер во триумфот на Торино од 2-1 против Милан во 26. коло од италијанската Серија А.
Сосема заслужено Торино дојде до победата, нанесувајќи им го шестиот сезонски пораз на „росонерите“, и покрај тоа што факт е дека гостите сами си пресудија со грешките во одбраната.
Се почна со очајната реакција на Мајк Мењон и Малик Тиао, кои по едно големо недоразбирање ја затресоа сопствената мрежа и донесоа водство за Торино од 1-0. Голманот се обиде да расчисти, но го погоди својот дефанзивец и топката несреќно заврши во голот на Милан.
Кристијан Пулишиќ не реализираше пенал во 32. минута за Милан откако Вања Милинковиќ-Савиќ одлично го прочита неговиот удар.
Милан израмни во 74. минута, кога Тијани Рајндерс со силен удар донесе 1-1. Но, веќе во 76. минута Торино веднаш возврати со голот на Гвидас Гинеитис, кој воедно и ги постави конечните 2-1.
Торино сега има 31 бод и се искачи на единаесеттата позиција, додека Милан направи чекор назад во битката за пласман во Лигата на шампионите и останува на 41 бод, доволни за седмото место на табелата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
