Комисијата за натпревари на Фудбалската федерација на Македонија го организираше редовниот семинар за делегати на натпреварите од Првата и Втората македонска фудбалска лига.
На семинарот се дискутираше за првиот дел од тековната натпреварувачка 2023/24 сезона во која учество и активности имаа сите делегати кои беа присутни на семинарот. Целта на работилницата за делегати на ФФМ е да се исправат одредени пропусти во организацијата на мечевите и во континуитет да се подобрува знаењето на службените лица во поглед на организацијата на натпреварите.
На редовниот семинар присутните имаа можност да го слушнат и предавањето од страна на Роберт Марковиќ од Комисијата за безбедност и интегритет при ФФМ. Пред делегатите беше промовирана и презентирана УЕФА програмата против местење фудбалски натпревари. Акцент беше ставен и околу дисциплинските санкции на клубовите во однос на нивните навивачки групи поради користењето на пиротехника и транспаренти со навредлива содржина на национална база за време на фудбалските натпревари во Прва и Втора МФЛ.
„На овој семинар, имавме можност да споделиме знаења, да направиме увид на сработеното во првиот дел од натпреварувачката сезона и стратегија која ќе ни помогне за подобра организација на натпреварите во иднина. Секој аспект на нашиот спорт се потпира на посветеноста и стручноста на луѓето кои директно се вклучени во натпреварите. Како делегати и официјални лица ја носиме одговорноста да ги поддржуваме вредностите на интегритет, почит и фер игра. Преку соработка и меѓусебна почит можеме да се движиме низ предизвиците што ни претстојат. Ваквите средби и семинари ни помагаат да создадеме трајни врски кои ќе ја зајакнат структурата на фудбалот во нашата држава и македонското првенство“ – истакна претседателот на Комисијата за натпревари, Игор Франговски на семинарот во хотелот „Хилтон“ во Скопје.
На крајот на редовниот семинар беше направена и редовната проверка на знаење (тестирање) на делегатите на Прва и Втора МФЛ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
