ЕКИПА во Дизелдорф,
Стеван Цаневски
Едвин Омерагиќ ќе го има своето деби за Македонија на големите натпреварувања, и тоа против актуелниот олимписки првак Франција. За остварувањето на сонот да биде уште поголемо, мечот ќе биде одигран на фудбалски стадион пред 55.000 навивачи, а младиот ракометар на Алкалоид не го крие воодушевувањето што ќе добие шанса да настапи на оваа средба.
„Кога се игра за репрезентацијата на Македонија секогаш постои возбуда и онаа позитивна трема. Ова ќе биде мојот прв натпревар за репрезентацијата на едно вакво големо натпреварување. Деби, на фудбалски стадион, пред повеќе од 50.000 гледачи и тоа против Франција. Ова е исполнување на сон. Некој да ми зборуваше дека вака ќе биде, немаше да му верувам“, вели Едвин Омерагиќ.
За квалитете на противникот не треба да се трошат премногу зборови, свесен е специјалистот за дефанзива на Алкалоид и на националниот тим.
„Играњето против Франција е посебен предизвик. Против себе ќе ги имаме најголемите светски имиња. Каде и да погледнеш има ѕвезда, буквално на секоја позиција од тимот. Напред е Никола Карабатиќ, погледнеш десно Дика Мем, на линија Фабрегас. Ќе биде голема борба. Прекрасно е чувството, голема возбудата и сите со нетрпение го чекаме овој дуел“, порачува Омерагиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
