Селекторот на македонската репрезентација, Благоја Боби Милевски сосема очекувано низ позитивно расположение го очекува последниот ноемвриски дел од Лигата на нациите, согласно одличните настапи на неговиот тим во септемврискиот и октомврискиот циклус по кои Македонија веќе е пред промоција во повисок ранг на натпреварување од следната сезона.
Сега пред избраниците на Милевски се нови натпревари со Летонија (14 ноември) и со Фарските острови (17 ноември), овој пат во Скопје, на кои, за првпат во историјата, ќе се заверува пласманот во Б-дивизијата од Лигата на нациите. Но, и ќе се атакува на серија рекорди за македонскиот репрезентативен фудбал.
„Секој бод и секој гол е важен за нас кога се игра во дресот на репрезентацијата. Посебно во ова издание од Лигата на нациите. Оваа генерација секој натпревар го почнува со победничка цел , па така ќе биде и сега. Победа е императив на мечот со Летонија, победа е императив и на мечот против Фарските острови кои се една навистина сериозна селекција. Секако, воопшто нема да бидат лесни и наивни натпревари, поради што е неопходна максимална подготовка“ – вели Милевски.
-На списокот се и двајца дебитанти, голманот Марко Алчевски од Хапоел Ерусалим и дефанзивецот Бехар Фета од словенечки Домжале, а повик доби и напаѓачот Сефер Емини од дански Сондерјиске.
„Им посакувам добредојде на сите нови играчи. Се надевам дека новоповиканите, заедно со Стојчевски и Илиевски, кој не е сега со нас, како членови на досегашната млада селекција во иднина ќе се наметнат и ќе бидат важен дел од тимот кој се гради. Наша тенденција е секогаш да даваме можност и на младите сили“.
-Националниот тим повторно се соочува со повредени фудбалери, нешто слично како и на претходните собири. Од октомврискиот циклус недостасуваат Иљазовски, Илиевски и Тихомир Костадинов.
„Да, имаме проблеми со повредени играчи и сега нема да сметаме на Тихо Костадинов, а под знак прашалник се Муслиу и Трапановски, иако се на списокот. Но, сите сме свесни за важноста на овие два меча и главна цел ни е да останеме на првата позиција која не носи во Б-дивизијата. Тоа е нашата цел, а се останато што ќе ни донесат двата натпревари ќе биде само плус од тоа што беше зацртано пред почетокот од Лигата на нации“.
-А, тоа плус од овие два натпревари, ако максимално се завршат, може да отвори и сериозен пат кон баражот за Светското првенство 2026.
„Да, иако е јасно дека патот до таму повторно ќе биде многу тежок. Но, навистина огромна е вербата во овие момци. Силно верувам во нивниот докажан квалитет. На списокот, ако се дополнат и оние отсутните поради повреди, е буквално најдоброто со кое располага македонскиот фудбал“.
-Нескриен проблем е и минутажата за поголемиот дел од репрезентативците во своите клубови.
„На секој кој знае фудбал му е добро јасно дека тие се најдобрите репрезенти на македонскиот фудбал од секој можен аспект кои многу пати досега потврдиле што за нив значи репрезентативниот дрес. Многу пати досега го потврдиле и својот потенцијал и квалитет на терен, и надвор од него, поради што се неизбежен дел од репрезентацијата. Знам дека секој од нив, без разлика и на минутажата која ја има во својот клуб, е максимално подготвен за тоа што не очекува на секој репрезентативен собир. Многу добро го познавам карактерот на секој од нив, и многу добро знам колку секој е подготвен да даде за селекцијата. Знам дека кога играат за Македонија момците даваат и повеќе од максимум. Секогаш кога играат во дресот на Македонија не штедат ни срце, ни енергија. Тоа го покажале многупати досега и знам дека така ќе биде и сега“ – вели селекторот Благоја Милевски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
