Германскиот селектор Јоаким Лев се соочува со огромни главоболки на денот на одигрување на дуелот со Исланд откако утрово беше обелоденето дека послените тестирања на Covid-19 покажале дека еден од германските репрезентативци е позитивен на коронавирус. Како што информира весникот „Билд“, станува збор за Јонас Хофман од Борусија Менхенгладбах.
Фудбалерот нема симптоми и веднаш заминал во самоизолација, но тој вчера тренирал со остатокот од репрезентацијата поради што постои загриженост дека во следните денови ќе се појават и нови случаи во таборот на „панцерите“. Врз сите фудбалери и членовите на стручниот штаб утрово биле извршени нови тестови, а по добивањето на тие резултати Лев ќе го состави стартниот тим за дуелот со Исланд.
Македонија треба да игра со Германија на 31 март во Дуизбург, а како што стојат работите лесно може да се случи Лев да биде приморан да повика дополнителни фудбалери токму за пресметката со нашата селекција.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА