Кошаркарскиот клуб Партизан е заинтересиран за ангажирање на центарот Тони Џекири, кој сака да ја напушти ЦСКА Москва.
Според италијанскиот новинар Андреа Калцони, црно-белите се на пазарот барајќи засилувања на центaрската позиција, а ситуацијата околу Џекири е директно поврзана со статусот на Тајрик Џонс. Според истиот извор, Олимпијакос покажал интерес за Џонс, најновите информации велат дека Американецот би можел да тргне и кон Израел и Макаби.
Секако, неговото потенцијално заминување би можело да отвори простор за евентуално доаѓање на Џекири во Белград.
Џекири е нигериски кошаркар, роден на 23 јули 1994 година во Лагос, кој игра како центар. Тој е висок 213 сантиметри и познат по својата физичка сила, скок и игра во рекет.
Својата колеџ кариера ја изгради на Универзитетот во Мајами, по што ја продолжи својата професионална кариера во Европа, каде што играше за бројни клубови. Играше во Турција, Белгија, Франција, Шпанија и Русија, а особено се истакна во дресот на Остенде, со кој го освои белгиското првенство и беше МВП на финалето на лигата.
Во текот на својата кариера, Џекири ги бранеше боите на клубови како Асвел, Басконија, Уникс од Казан, Фенербахче и ЦСКА од Москва, со кои освои трофеи во ВТБ лигата. Се профилираше како сигурен центар во Евролигата, ценет по својата одбрана, контрола на скоковите и тимска игра.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
