Еден од најдобрите македонски спортисти, каратистот Емил Павлов продолжи таму каде што заврши минатата година пред почетокот на пандемијата од коронавирусот. Тој на силната Премиер-лига освои бронзен медал и повторно се најде во елитата на светското карате. Павлов веднаш по борбата за ЕКИПА.МК вели дека е презадоволен од својот настап во Истанбул и дека продолжува со напорни тренинзи како би ја остварил најголемата цел, а тоа е учество и медал на ЛОИ во Токио.
„Презадоволен сум од настапот и прикажаното на Премиер-лигата во Истанбул. Продолжив таму каде што завршив пред пандемијата, повторно со одличен резултат на неверојатно силно натпреварување. Една година бев без натпреварување, но овој медал не е случаен. Откако почна пандемијата со коронавирусот јас во ниту еден момент не застанав со тренинзи. Ќе продолжам со напорни тренинзи и многу работа како би можел да ја остварам мојата најголема цел, а тоа е норма и медал од Летните олимписки игри во Токио. Околу денешната борба одработив максимално паметно и сконцентрирано. Добро го познавам казахстанскиот каратист и добро знаев што ме очекува во борбата. Со селекторот Сашко Арсовски одлично го анализиравме и на крајот дојде успехот“, вели Павлов.
Павлов сега го очекува Државното првенство на Македонија и плеј-офот кои се квалификациски турнири за Европското првенство, а потоа во мај месец во Париз се квалификациите за ЛОИ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
