Пелистер со најтешкото свое гостување, против најголемиот свој ривал во вечното-дерби ја стартува денеска новата сезона во Првата македонска фудбалска лига.
Тренерот Димитар Капинковски најавува дека битолчани ќе дојдат мотивирани во Скопје за дерби натпреварот од првото коло со Вардар, во желбата да се изборат за позитивен резултат, и покрај тоа што е јасно дека фаворитската улога е на страната на домашните.
„Многу нешта се сменија, имаме нова управа, нов тренер, а заминаа осум играчи од ланскиот состав. Ова се големи промени, а ние тековно се екипиравме и се обидовме да составиме еден балансиран тим. Преодниот рок истекува во септември, но јас сепак верувам дека ростерот е солидно пополнет и нема да има потреба да реагираме со уште ангажмани. Сакаме да се претставиме во најдобро светло, а во моментов имаме само еден повреден играч, Јове Трајковски, кој ќе мора да ја паузира целата полусезона поради скинати лигаменти“, вели Капинковски.
Со оглед на тоа што Вардар веќе имаше официјални натпревари, тренерот на Пелистер не сака однапред да прифати подредена позиција во големото дерби.
„Ова е најголемо македонско дерби и претставува предизвик за сите играчи, па и за тренерите. Од наша страна, почитта за успесите и резултатите на Вардар е максимална, но наше е да го дадеме максимумот и да пробаме да извлечеме позитивен резултат“, заврши Капинковски.
Капитенот Мирко Ивановски ја потенцира добрата атмосфера меѓу играчите во битолскиот клуб, додека за самиот натпревар вели дека немаат право на грешка.
„Факт е дека сме во фаза на оформување на тимот, имаме шест нови играчи, а до нив е да докажат дека се вистински засилувања. Имаме добра атмосфера, постои одредена хемија, но очекувам од коло во коло да стануваме подобри и веќе до првата репрезентативна пауза да бидеме комплетни во меѓусебното запознавање. Добро е што ова дерби се случува на стартот, ќе беше поинаку ако околностите и позицијата на табелата влиајеа на некој од тимовите, вака атмосферата ќе биде како да играме финале во Купот, каде што никој нема право на грешка и сите го сонуваат успехот“, резимираше Ивановски.
Натпреварот се игра во вечерен термин од 20 часот на Националната Арена „Тодор Проески“ во Скопје.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
