Битолски Пелистер го промовираше крилниот офанзивец Бобан Георгиев како свое ново засилување за враќањето во Првата македонска фудбалска лига.
„Задоволство ни е да ја известиме фудбалската јавност дека Бобан Георгиев е нов фудбалер на ФК Пелистер. Бобан игра на десната крилна позиција, но истовремено може да ја покрива и левата крилна позиција. Со своето искуство ќе комплетира огромен дел од мозаикот на Костов“ – информираат од Пелистер.
Георгиев во Пелистер доаѓа од екипата на Воска Спорт, а претходно има играно и за Брегалница, Силекс, Радник Сурдулица, Борац Бања Лука и Леотар Требиње. Минатата сезона настапи на 28 меча во Првата лига, а притоа постигна еден гол и 11 асистенции.
Екипата од Битола претходно ги промовираше Мирко Ивановски, Александар Ристевски, Филип Тодороски, Виктор Серафимовски и Дамјан Масевски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
