Ракометарите на Пелистер врзаа две победи во низа откако по голема битка вечерва славеа на гостувањето во Скопје против Вардар јуниор со резултат 30-34. Без оглед на конечниот исход мора да се истакне дека битолчани во поголем дел од мечот бркаа резултат, на одмор се замина со водство на Вардар јуниор од 19-16, на половина од вториот дел домаќините имаа 25-22, но Пелистер се разбуди во вистински момент, го сврте резултатот во своја полза и стигна до победата.
Табангует со осум гола беше најефикасен во победничкиот тим, седум постигна Поповиќ, а шест Маџовски.
Многу интересно беше и на дуелот меѓу Струга и Прилеп, на кој гостите изненадија со добра игра во одбраната и освоија еден бод, ремизирајќи 23-23. Стружани делуваа сигурни на патот до победата, но со падот во концентрација во самиот финиш му овозможија на гостинот да се врати и да ги изненади. Бозароски со девет гола, два од нив во последната минута, беше херој на гостинскиот тим.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
