Кошаркарите на Пелистер со пораз ја заокружија дебитантската сезона во ФИБА Европа купот откако вечерва загубија на домашен терен од Керавнос со резултат 74-92. Исто како и на првиот меч во Никозија, пресудна беше катастрофалната игра во одбраната со која му се дозволи на противникот целосно да ги контролира темпото и резултатот, со што Керавнос го освои третото место во групата, пред Пелистер на четвртата позиција со конечен скор од една победа и пет порази.
Проблемите во одбраната беа очигледни од самиот почеток, па така Пелистер по нецели седум минути игра веќе имаше 14 поени негатива (8-22). „Зелено-белите“ се консолидираа само за момент, ја завршија првата четвртина со 18-29, а потоа преку Лука Стојановски намалија на 21-29. Сепак, Керавнос за неколку минути ја зголеми својата предност на огромни 20 поени (25-45), Пелистер со серија 11-0 предводена од Вилсон повторно спушти под десет (36-45), но на одмор се замина со водство на гостите од 42-56.
Наместо камбек на македонскиот тим, второто полувреме донесе продолжување на доминацијата на Керавнос, гостите во 25. минута поведоа со 45-66, завршувајќи ја третата четвртина со 55-76, потоа рутински приведувајќи го мечот до крај со конечните 74-92.
Брејси Дејвис беше прв стрелец на Пелистер во овој пораз со 16 поени, еден помалку имапе Си-Џеј Вилсон, Малешевиќ заврши со 14, а Ленгстон Вилсон со 13 поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
