Македонскиот ракометен тим Еурофарм Пелистер стигна до втората победа сезона во Лигата на Европа, откако на домашен терен славеше над унгарска Татабања со 21-19. Битолчани одлично го отворија натпреварот и на средината на првото полувреме имаа предност од 9-4. Сепак, следуваше голем пад до крајот на првите 30 минути во кои успеаја да постигнат само два гола и на пауза да заминат со минимална позитива од 11-10.
Второто полувреме продолжи во ист ритам и се играше гол за гол се до последните десет минути. Пелистер заигра подобро и предводен од најновата аквизиција Хендави кој беше феноменален на голот успеа да го урне отпорот на гостинот и да стигне до конечен триумф од 21-19.
Томислав Кушан со сто процентен учинок 6/6 беше најпрецизен во таборот на битолчани, додека пет гола постигна Стипе Мандалиниќ, а одличен на голот беше Хендави кој запиша девет интервенции. Кај поразените Матијаш Ѓер натпреварот го заврши со шест гола, а Габор Анцин постигна четири, но со очајна реализација од 11 шута.
Пелистер со триумфот се искачи на 3. позиција на табелата во групата Д со пет бода, додека Татабања останува на дното без ниту еден освоен бод.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
