Пелистер убедливо поразен во БиХ, ги загуби сите шанси во АБА2

Кошаркарите на Пелистер со вечерашниот пораз од Широки Бријег од убедливи 93-73 ги загуби сите шанси за пласман во следната фаза од АБА2 лигата. Битолчани се наоѓаат во криза, па по поразите од Шкупи и од Работнички на домашната сцена вечерва немаа сили за изненадување против силниот состав на Широки.

Пелистер целосно парираше само во првата четвртина, во која битолчани одиграа беспрекорно во нападот. Во преден план беше Бојиќ со 10 поени за помалку од десет минути игра, Антоан исто така даде свој придонес, но Широки благодарение на шутот од далечина ја доби стартната четвртина со минимални 24-23. Домаќините продолжија во силен шутерски ритами на стартот од вториот период, во 13. минута Широки веќе имаше постигнато седум тројки (7/10), и тоа од седум различни кошаркари. Едвардс беше единствениот расположен во нападот на Пелистер во овој период, па тимот од БиХ лесно стигна до првото двоцифрено водство (39-29). Пред крајот на четвртината кошаркарите на Широки почнаа да промашуваат од далечина, но затоа во рекетот го имаа одличниот Планиниќ, кој со неколку реализации помогна убедливата предност да биде задржана и Широки на одмор да замине со убедливи 53-39.

Сите шанси за камбек исчезнаа по само неколку минути игра во третата четвртина, во која Пелистер веќе ја немаше ниту сигурноста во нападот, а домаќините го искоритија тоа за да стигнат и до „плус 20“ (62-42, 25. минута). Петровиќ зеде тајмаут, негативата само за момент беше намалена на 15 поени, но потоа следеше нова серија на Широки Бријег со која домашната екипа поведе со 75-49 во 27. минута, за третата четвртина да заврши со водство на домаќините од 79-55. Последните десет минути минаа во рутинско одржување на предноста од страна на домашниот тим, кој заслужено славеше со конечни 93-73.

Едвардс со 20 поени беше најефикасен во победничкиот тим, два поени помалку реализираше Андрија Бојиќ, а двоцифрен беше и Антоан, завршувајќи го натпреварот со 11 поени и 3 асистенции.