Фудбалската Асоцијација на Јужна Америка, КОНМЕБОЛ, ги изрече казните за големиот инцидент по завршувањето на полуфиналето на Копа Америка кога дел од уругвајските фудбалери се качија на трибината и влегоа во физичка пресметка со колумбиските навивачи.
Уругвајците бурно реагираа по мечот критикувајќи ги организаторите за катастрофалната безбедност, бидејќи нивните семејства биле нападнати на трибините и тие затоа морале да се тепаат со противнички навивачи за да ги заштитат своите најблиски. И покрај фактот за организациски пропусти, Уругвајците платија скапа цена за големиот инцидент, откако дел од првотимците заработија суспензии.
Прв на листата е Дарвин Нуњез, откако голгетерот на Ливерпул прв се прекачи преку оградата и тргна да се тепа со Колумбијците на трибината. Тој е санкциониран со пет меча суспензија за наредните настапи на националниот тим, а играчите кои тргнаа по него исто така се санкционирани, Родриго Бентанкур со четири меча неиграње, а Оливера, Араухо, Касерес и Хименез добија суспензии од по три натпревари.
Покрај тоа, Уругвајката Фудбалска Федерација ќе плати 97.000 долари казна за однесувањето на своите фудбалери.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
