Ракометарите на Пролет со победа против Охрид на домашен терен со 28-24, ја отворија новата суперлигашка сезона. Скопскиот суперлигаш беше во водство во поголем дел од натпреварот и заслужено ги освои првите бодови иако Охрид остана во игра до крај.
Охриѓани добро го отворија натпреварот и по првите пет минути водеа со 4-0 благодарение на ефикасната серија на Бобан Блажески кој постигна три од првите четири гола на гостите. Но, Пролет успеа брзо да се консолидира по стартниот шок, изедначи на 5-5, а потоа го презеде водството. Гостите се обидоа да се вратат во игра, дојдоа ушпте еднаш во позитива со 9-11. Пролет на одмор замина со минимална предност од 13-12, но имаа свои минути на стартот од второто полувреме.
Избраниците на тренерот Никола Матлиески ја почнаа втората половина со серија од 6-1 и стигнаа на 18-13. И кога се чинеше дека победникот е веќе решен, охриѓани одново се вратија во игра, успаја да ја стопат негативата на 20-18 и внесоа неизвесност во финишот на натпреварот. Бобан Блажески и Иван Тасески беа нерешлива енигма за одбраната на Пролет и најголема закана по голот на домаќините. На десет минути пред крај резултатот беше 23-22. Во решавачките моменти одговорноста во нападот на Пролет ја презеде Ласко Андоновски и успеа да ја прекине серијата на охриѓани. Пролет беше поефикасен во финишот, постигна четири гола во серија и ја обезбеди победата.
Стефан Трајковски со осум гола беше прв стрелец во тимот на Пролет, Филип Василевски и Мартин Манасков постигнаа по пет, а Ласко Андоновски додаде четири гола за домашниот тим. Нападот на охриѓани го предводеше Бобан Блажески со девет гола, Иван Тасески постигна шест, а Крсте Андоноски запиша три гола.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
