Во салата „Јордан Мијалков“ во Штип вечерва од 19 часот започнува битката за шампионската титула во машка конкуренција, во која екипата на Струмица 47&72 тргнува по 12-тата круна во клупската историја, додека Штип УГД атакува на прв шампионски пехар.
Штипскиот состав втора година во низа е освојувач на куп-трофејот, а во финалната серија влегува како фаворит со желба да ги обедини титулите и да испише клупска историја. Екипата на Кристијан Ристески има три победи во низа во пролетниот дел од сезоната против струмичани, последната во финалето на Купот на ОФМ, на 5 април во Радовиш. Штип УГД е свесен за епитетот фаворит, но добро ги познава и квалитетите на противникот, па со респект влегува во финалната серија.
„Финалната серија ја дочекуваме со три последователни победи против екипата на Струмица. Фаворитската улога можеби е на наша страна, но Струмица е бранител на титулата, долгогодишен првак и противник кој го почитуваме, и сето тоа дава дополнително голема тежина и за двете екипи. Очекувам пред сè една убава одбојкарска претстава со атрактивни поени, неизвесност и борба за секој поен, како што доликува на едно финале. Серијата ја започнуваме пред домашната публика, која верувам ќе ни даде голема поддршка со полна сала и со убава и победничка атмосфера, што ќе ни биде ветер во грб за со победа да стартуваме во првиот натпревар од финалето“ – истакнува тренерот на Штип УГД, Кристијан Ристески.
Бранителот на титулата Струмица 47&72 имаше многу тешка сезона, со голем број пехови со повредени играчи, но успеа тимот да ги мобилизира редовите и да стигне и до финалето во Купот на ОФМ, а сега и во позиција да брка нова шампионска круна. Струмичани имаа 11 шампионски титули во клупските витрини, седум од нив во последните осум години, не сметајќи го ковид-првенството кое не се доигра.
„Со четворица повредени играчи, од кои двајца искусни репрезентативци, тешко се ‘носиме’ сезонава, но нема предавање. Традицијата е на наша страна, секако желбите и амбициите се шампионската титула да остане во наш посед. Факт е дека ќе биде тешко, но одлично се познаваме со Штип УГД и како екипи, но и индивидуалните квалитети на играчите, маните и предностите. Добро ги анализиравме последните меѓусебни дуели, извлековме поука од грешките кои ги имавме во финалето на Купот и подготвени сме. Сега останува она што е тактичка замисла да го пренесеме на теренот. Ќе го дадеме максимумот, ќе се бориме за секоја топка, па ќе видиме и среќата на чија страна ќе биде“ – коментира Јован Ристоманов, предводникот на Струмица 47&72 и додава:
„Се надевам дека ќе имаме долга финална серија, со убава одбојка, атрактивна и со натпревари за уживање кои ќе бидат добра увертира за настапите на машката репрезентација летово.“
Сите натпревари од финалната серија во машка конкуренција ќе имаат директен пренос на националниот сервис како медиумски партнер на Одбојкарската федерација на Македонија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
