Перо Антиќ е многу блиску до напуштање на претседателската фотелја во КФСМ откако клубовите кои во изминатиот период му искажаа недоверба сега потпишаа и поднесоа иницијатива за Вонредно Собрание.
Движењето за смена на актуелното раководство се обиде и на последното Редовно собрание во декември 2024 да го смени
Антиќ, но тоа не се случи откако актуелниот претседател не ја ставаше на дневен ред точката за (не)доверба на претседателот, поради членот во Статутот што му гарантираше две години од мандатот по неговиот реизбор во 2023 година.
Тој рок од две години измина на 29 април, по што денеска и официјално беше поднесено барање за Вонредно собрание на кое се очекува да биде сменет Антиќ.
Иницијативата била поднесена со 37 потписи, што е апсолутно мнозинство и јасен знак дека во најскоро време ќе дојде до промена на чело на КФСМ. Се очекува на следното собрание единствен кандидат за нов претседател да биде Младен Ѓуроски, кој впрочем и денеска лично ја поднел иницијативата во куќата на кошарката.
Согласно Статутот, Антиќ и актуелното раководство имаат рок од 14 дена да закажат Собрание по поднесената иницијатива. Доколку не го сторат тоа, Ѓуроски и клубовите би можеле самите да оргнаизираат Собрание на кое би одлучувале и без присуство на актуелниот претседател.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
