Хрватските хулигани кои беа уапсени по ужасните нереди во Атина во кои загина 29-годишен навивач на АЕК запаѓаат во се поголеми неволји во Грција.
Тамошните медиуми јавуваат дека сите уапсени ќе завршат во истражен затвор. Се очекува првите 41 од групата од повеќе од стотина уапсени да бидат распределени во 16 затвори во Грција. Наводно, осум хулигани на Динамо ќе бидат испратени во затворот Авлона, шест во Коридалос, а останатите 27 ќе бидат префрлени во уште 14 затвори.
Намерата на Грците да ги испратат Бед Блу Бојс во повеќе различни затвори ги загрижи родителите на уапсените кои се плашат за својата безбедност.
Хрватските хулигани веќе се пожалија на условите во притворот, а ситуацијата во грчките затвори е многу полоша, пишува „Индекс“. Грчките затвори се преполни, условите за живот се многу лоши и често избувнуваат немири.
Истиот извор го цитира извештајот на Комитетот за спречување на тортура, нечовечко постапување и казнување, тело на Советот на Европа, во кој жестоко се критикува речиси се што е поврзано со затворите во Грција – пренатрупаност, тепање, корупција на чуварите. Исто така, низа забелешки за состојбата во тие затвори го презентираше и извештајот на американскиот Стејт департмент.
Во извештајот на Советот на Европа се наведува дека „премногу затвореници во Грција се уште се во услови кои претставуваат повреда на човечкото достоинство“. По десетдневната посета на пет грчки затвори, заклучокот беше дека се забележани лоши услови на притвор, насилство, сериозен недостиг на кадар и несоодветна здравствена заштита… Во рамките на таа „инспекција“ беа посетени затворите Коридалос, Нигрита , како и затворите на островите Хиос, Крф и Кос. „Во тоа време во Грција имаше 11.182 затвореници, додека максималниот капацитет беше 10.175. Стапката на искористеност тогаш беше 110 проценти.
„Индекс“ објави и видео од затворот Коридалос, на кое се гледа просторија од 25 метри квадратни во која „живееле повеќе од 15 луѓе“. Овие сцени се снимени со мобилен телефон што го шверцувале затворениците. Во тој момент, наместо планираните 60 затвореници, во крилото на машката болница беа сместени повеќе од 200 затвореници.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
