Алкалоид е на добар пат да обезбеди историско полуфинале во ЕХФ европскиот куп откако избраниците на Кире Лазаров одиграа одлично прво полувреме на реваншот со Баја Маре и имаат предност од 18-12, позитива од шест гола што ќе треба да ја одбранат ако сакаат да стигнат до следната фаза. Првиот меч во Романија заврши без победник, но Алкалоид вечерва одигра извонредно прво полувреме во кое им одржа лекција по модерен ракомет на гостите, трасирајќи си го патот до полуфиналето.
Натпреварот почна извонредно за актуелниот освојувач на Купот на Македонија, откако Галевски отвори со три одлични интервенции, а „сино-белите“ набрзина поведоа со 4-0. Гостите од Романија делуваа во шок од она што ги снајде, а Алкалоид го искористи тоа за набрзина да поведе со 8-2. Баја Маре за момент намали на 8-4, но следеа два гола од сопствената половина на голманот Галевски со кои Алкалоид ја врати сигурноста во својата игра.
Македонскиот претставник не само што не застана, туку Алкалоид уште посилно продолжи до крајот на полувремето, со головите на Ѓоргиев и на Ивановски поведувајќи со 17-10. Гостите за момент го запреа налетот на Алкалоид преку Да Силва, следеше одговор со нов гол на Ивановски, по што на одмор се замина со убедливи 18-12 за македонскиот тим.
Покрај голманот Галевски, најзаслужни за ваквата предност се крилото Петковски со четири погодоци, додека по два гола во првото полувреме постигнаа Серафимов, Стојковиќ, Ѓоргиев, Ивановски и Франциско.
Во прилог на Алкалоид оди и што во случај на пласман во полуфиналето, таму ќе се сретне со норвешки Рунар Сандефјорд. Норвежаните приредија сензација елиминирајќи го големиот фаворит Олимпијакос, Грците имаа „плус шест“ од првиот меч, но реваншот во Скандинавија заврши со преубедливи 33–23 за Сандефјорд.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
