Најдобриот македонски тенисер Калин Ивановски оваа недела е дел од тенисерите кои ќе настапат на ИТФ фјучерсот во словачкиот град Трнава. Негов ривал во првото коло е 23-годишниот тенисер од Словенија Филип Џеф Планиншек, кој се наоѓа на 821.то место на АТП листата што е негов најдобар ранг во кариерата.
Мечот според програмата е закажан за утре (вторник), како меч број 3 на теренот број 1. Почетокот на мечот нема да биде пред 13 часот, од причина што претходно на тој терен се играат два меча.
Ивановски немаше настапи оваа година, откако на почетокот на сезоната поради повредата мораше да направи пауза. По неколку месеци мирување, на Ивановски му беше извршена и операција, а потоа следуваше и периодот на рехабилитација по која почна и со тренинзи и откако лекарите дадоа „зелено светло“ македонскиот тенисер оваа недела ќе го има својот прв настап во 2024 година.
Ивановски последните мечеви ги одигра лани во ноември месец на Челинџер турнирите во Јапонија, а најдобриот ранг го имаше кон средината на октомври 2023 година кога беше 305.то место на АТП листата.
Првиот ривал годинава Планиншек во мечот со Ивановски влегува со серија од пет порази, а претходно играше финале на фјучрс турнир во Марибор.
Турнирот во Трнава се игра во сала на тврда подлога и е од рангот М25 со награден фонд од 25.000 долари.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
